کیلا تقریباً ہر ایک کو پسند ہوتا ہے کیونکہ اس پھل کا ذائقہ کبھی کھٹا یا کڑوا نہیں بلکہ ہمیشہ میٹھا ہوتا ہے۔ خاص طور پر بچے تو کیلے کے بہت شوقین ہوتے ہیں اور مائیں بھی بچوں کو کبھی شیک کی صورت کیلا دے رہی ہوتی ہیں تو کبھی کسٹرڈ میں ڈال کے کیونکہ یہ پھل صحت کا خزانہ ہے اور نشونما کے تمام بہترین اجزاء اس میں پائے جاتے ہیں۔
لیکن کیلے کا چھلکا جسے عام طور پر پھینک دیا جاتا ہے اس کے بھی بیش بہا فائدے ہیں۔ البتہ اس آرٹیکل میں ہم ان چھلکوں کے وہ فائدے بیان کرنے جارہے ہیں جو آپ کی جلِد کو ایسی رعنائی اور تازگی عطا کریں گے جو مہنگی سے مہنگی کریم بھی نہیں دے سکتی۔ جِلد پر دانے یا داغ دھبے ختم کرنے کے لئے کیلے کے چھلکے کا ایک ٹکڑا لیں۔ اب اس پر ایک لیموں کا رس ٹپکائیں اور ایک چمچ شہد اچھی طرح پھیلا لیں۔ اب اس چھلکے کو اپنی جلد پر دس سے بارہ منٹ تک ہلکے ہلکے ملیں۔ آدھا گھنٹا خشک ہونے دیں اور پھر ٹھنڈے پانی سے دھو لیں۔ چند دن مسلسل استعمال کرنے سے پرانے داغ بھی کم ہوجائیں گے۔ عمر کے بڑھتے اثرات اور جھریاں کم کرنے کے لئے اب مہنی مہنگی کریموں پر پیسہ ضائع کرنے کی کوئی ضرورت نہیں کیوں کہ وہی اجزاء آپ کو کیلے کے چھوٹے سے ٹکڑے میں بھی مل جاتے ہیں وہ بھی بنا کسی کیمیکل کے۔ جھریاں اور لٹکی ہوئی جلد کو واپس تازگی عطا کرنے کے لئے کیلے کے چھلکے کا چھوٹا ٹکڑا لیں اور اسے براہِ راست چہرے پر ملیں۔ خشک ہونے پر چہرہ ٹھنڈے پانی سے دھو لیں
دراصل کیلے کا چھلکا اپنے پھل کی طرح پوٹاشئیم سے بھرپور ہوتا ہے جو جِلد کی نشونما بہترین انداز میں کرتے ہیں۔ پوٹاشئیم جلِ کو جھریوں سے پاک اور نرم ملائم بناتا ہے۔ اس کے علاوہ چھلکے میں موجود لیکٹن نامی جز اپنے اندر اینٹی بیکٹیریل خصوصیات رکھتا ہے جن کی وجہ سے سرخ دانوں اور مہاسوں سے چھٹکارا حاصل کرنے میں مدد ملتی ہے۔ کیلے کے چھلکے میں وٹامن سی، وٹامن ای اور بڑی مقدار میں وٹامن ای موجود ہوتا ہے جو جِلد کو ہر طرح صحت مند رکھنے میں مدد دیتا ہے
